Израелскиот премиер се појави пред судот шести пат во судскиот процес против него за корупција

КУДС (ЕРУСАЛИМ) (АА) - Израелскиот премиер Бенјамин Нетанјаху денес шести пат се појави во судот во Тел Авив за да сведочи во судскиот процес кој е започнат против него за корупција, јавува Анадолу.

Според израелскиот „Канал 12“, Нетанјаху продолжува да се брани во случајот познат како „4000“, во кој е обвинет за давање регулаторни услуги на Шаул Елович, тогашен сопственик на телекомуникациската компанија „Безек“ и новинската веб-страница Вала, во замена за покривање кое оди во негова и во корист на неговата сопруга.

Медиумите наведуваат дека премиерот и неговите адвокати се обидуваат да докажат дека веб-страницата „Вала“ има непријателска позиција кон Нетанјаху и дека односот меѓу него и веб-страницата за вести „не бил необичен“.

Нетанјаху се соочува со три одделни случаи за корупција поднесени против него во 2019 година: Случај 1.000, Случај 2.000 и Случај 4.000, кои вклучуваат обвинувања за поткуп, измама и нарушување на довербата.

Израелскиот премиер негира дека сторил нешто лошо, нарекувајќи ги обвинувањата „лажни“.

Нетанјаху, чие судење започна на 24 мај 2020 година, е првиот актуелен израелски лидер кој сведочи како кривично обвинет во историјата на земјата.

Според израелскиот закон, тој не е обврзан да поднесе оставка, освен ако не биде осуден од Врховниот суд, процес што може да потрае неколку месеци.

Нетанјаху, исто така, се соочува со обвиненија за воени злосторства и злосторства против човештвото. Меѓународниот кривичен суд (МКС) издаде налози за апсење на Нетанјаху и на поранешниот министер за одбрана Јоав Галант во ноември поради злосторствата во Газа, каде што се убиени над 45.300 луѓе, главно жени и деца.