Израелски министер го поздрави убиството на шефот на Политичкото биро на Хамас, Исмаил Ханије, во Техеран

КУДС (ЕРУСАЛИМ) (АА) - Израелскиот политичар од крајната десница и министер за наследство, Амихаи Елијаху, го поздрави убиството на Исмаил Ханије, шефот на Политичкото биро на Хамас, јавува Анадолу.

Палестинската група на отпорот Хамас рано утрово објави дека Ханије е убиен во израелски воздушен напад врз неговата резиденција во иранскиот главен град Техеран.

„Железната тупаница е таа што ќе донесе мир и малку утеха и ќе ја подобри нашата можност да живееме во мир со оние што сакаат мир“, истакна израелскиот министер преку платформата Х.

„Смртта на Ханије го прави светот малку подобар“, додаде тој.

Елијаху е министер од крајната десничарска партија Еврејска моќ, предводена од Итамар Бен-Гвир.

Од Израел нема коментар за атентатот.

Иранската државна телевизија, исто така, ја објави смртта на Ханије, истакнувајќи дека истрагата за атентатот е во тек и дека наскоро ќе бидат објавени резултатите.