Esat Fırat
25 Ноември 2020•Ажурирај: 26 Ноември 2020
ЕРУСАЛИМ (АА) - ЕСАТ ФИРАТ - Израелските војници се обидоа насилно да приведат Палестинец, што се наоѓал во амбулантното возило на брзата помош бидејќи бил ранет при израелската интервенција врз демонстрантите, кои протестирале против политиката на Тел Авив за рушење и изградба на еврејските населби и активностите за нивно проширување во регионот на Јорданската Долина, во источниот дел на окупираниот Западен Брег, јавува Агенција Анадолија (АА).
Обидот на израелските војници за приведување на повредениот Палестинец, што се наоѓал во амбулантното возило на палестинската Црвена полумесечина, на самото место на настанот го сними камерманот на АА, Хишам Абу Шакра.
На снимката направена од Абу Шакра се гледа како израелските војници ги отвораат вратите од амбулантното возило и сакаат со сила да го приведат ранетиот Палестинец, на кој во внатрешноста на возилото медицинско лице му укажува прва помош.
- Војниците го нападнаа и медицинското лице -
Израелските војници, кои го нападнаа и медицинското лице од првата помош, не се откажаа од приведувањето на ранетиот, и покрај неговите врисоци.
Лицето од екипата за прва помош, кое брзо ги затвори вратите на возилото на брзата помош околу кое брзо се собраа војниците, откако успеа да ги оттурне војниците, заедно со повредениот успеаја да го напуштат местото на настанот.
По повик на палестинските групи, вчера се одржаа демонстрации во бедуинското село Горна Хамиса во Јорданската Долина, кое претходно беше на израелската агенда за рушење.
Израелските војници користеа солзавец и вистински и пластични куршуми за да ги растераат демонстрантите. Во операцијата во која војниците и физички интервенираа врз Палестинците, тројца демонстранти се повредени од пластични куршуми, а голем број демонстранти ги почувствувале последиците од гасот.
Израелските сили на 3 ноември извршија рација во бедуинското село Хамиса, во руралната област источно од градот Тубас на Западниот Брег, уривајќи притоа 11 куќи во кои живееле 23 семејства, со образложение дека биле нелегални.
Според палестинските власти, администрацијата на Тел Авив, во рамките на проектите за анексија и изградба на еврејски населби, се обидува да ги расели Палестинците кои живеат во т.н. „област Ц“ на окупираниот Западен Брег.
Според Вториот договор во Осло, потпишан меѓу Палестина и Израел во 1995 година, окупираниот Западен Брег беше поделен на региони А, Б и Ц.
Административната и безбедносната контрола врз „Зоната А“, која опфаќа 18 проценти од територијата, ѝ беше доделена на Палестина, администрацијата врз „Зоната Б“, која опфаќа 21 процент од територијата, ѝ беше доделена на Палестина, а безбедносната контрола му беше доделена на Израел, додека администрацијата и безбедноста врз „Зоната Ц“, која опфаќа 61 процент од територијата, му беа доделени на Израел.
Од локални извори се дознава дека израелските сили само минатата година срушиле 521 палестински дом во Источен Ерусалим и на Западниот Брег, со образложение дека се „нелегални“ или дека се изградени во „Зоната Ц“.
- Уривањата на Израел во Источен Ерусалим -
Израелските власти, кои ги заострија условите за издавање дозволи за градба на Палестинците, уриваат илјадници куќи на Палестинците, со образложение дека немаат дозвола за градба.
Палестинците, истакнувајќи дека израелската општина нема никаква правна основа за уривање на куќите, посочија дека тоа е дел од политиката на Израел за заплашување и јудаизам.
Израелската општина честопати ги наплатува трошоците за уривање од сопственикот чија куќа е уништена.
Палестински извори соопштуваат дека од 1967 година, над 5.000 палестински куќи во Источен Ерусалим биле урнати од страна на израелските сили.
