СКОПЈЕ АА) – Израелската Армија денес изврши нов воздушен напад во јужниот дел на Појасот Газа, што претставува најново прекршување на прекинот на огнот со Хамас, јавува Анадолу.

Воздушните и артилериските напади беа насочени кон источниот дел на градот Кан Јунис, каде што голем број куќи и објекти беа сериозно оштетени.

Хамас го обвини Израел дека е единствено одговорен за ескалацијата на насилството во Газа, истовремено потврдувајќи ја својата целосна посветеност на прекинот на огнот.

Палестинското движење ги повика посредниците и гарантите на договорот да преземат одговорност и да извршат итен притисок врз Израел за да ги запре, како што наведоа, „масакрите врз палестинскиот народ“.

Од октомври 2023 година, израелските напади во Газа усмртија повеќе од 68.600 Палестинци, главно жени и деца, а над 170.000 се повредени.

Разорната војна беше прекината со договорот за прекин на огнот кој стапи во сила на 10 октомври, врз основа на планот од 20 точки предложен од американскиот претседател Доналд Трамп.