Израелската Амбасада во Ирска го симна знамето пред затворањето

ЛОНДОН (АА) - Израелската Амбасада во Даблин денес го симна своето национално знаме, сигнализирајќи ги првите чекори кон нејзиното затворање, јавува Анадолу.

Ова следуваше по најавата на израелскиот министер за надворешни работи Гидеон Сар дека Амбасадата ќе биде затворена поради, како што ја нарече, „антисемитската реторика“ на Ирска, тврдење кое Даблин го негира.

Сар го критикуваше признавањето на палестинската држава од страна на Ирска и ја обвини земјата дека се обидува да го редефинира „геноцидот“ во меѓународното право за да ги поддржи барањата против Израел пред Меѓународниот суд на правдата.

Отстранувањето на израелското знаме од локацијата на Амбасадата на патот Шелбурн, Балсбриџ, се случи набргу по објавата на Сар.

Според јавувањата на ирските медиуми, портпаролот на Амбасадата го потврдил отстранувањето на знамето, велејќи: „Знамето е симнато по инструкцијата на министерот за надворешни работи за затворање на Амбасадата“.

Сепак, портпаролот појасни дека Амбасадата сѐ уште не е официјално затворена.

Ирскиот премиер Сајмон Харис ги отфрли тврдењата за антиизраелско расположение, тврдејќи дека надворешната политика на Ирска останува цврсто посветена на човековите права, меѓународното право и мирот.