„Децениската израелска окупација на палестинските земји е нелегална и нехумана“

АНКАРА (АА) – Јордан денес на сослушувањето пред Меѓународниот суд на правдата (МСП) ја нарече децениската израелска окупација на палестинските земји „нелегална“ и „нехумана“, јавува Анадолу.

„Стојам пред вас денес додека се појавуваат крвавите и нехуманите зла на израелската окупација. Палестинците во Газа умираат поради израелската агресија и умираат од глад поради загубата на храна и лекови, кои Израел продолжува да ги спречува во Газа, кршејќи го меѓународното хуманитарно право, спротивно на мерките на вашиот суд“, изјави министерот за надворешни работи Ајман Сафади пред судот во Хаг.

„Нема зборови со кои може да се опише варварството на израелската агресија во Појасот Газа“, рече Сафади.

Тој додаде дека половина милион Палестинци во Газа умираат од глад.

Шефот на јорданската дипломатија го обвини Израел дека не го почитува меѓународното право.

„Ниедна земја не треба да биде над законот. Но на Израел не му е гајле и дозволено му е да не се грижи за меѓународното право. Оваа ситуација не може да продолжи. Израелската окупација е нелегална. Таа е нехумана. Мора да заврши“, нагласи Сафади.

Јавните сослушувања започнаа во понеделникот во Хаг по барање на Генералното собрание на Обединетите нации за советодавно мислење за правните последици што произлегуваат од политиката и практиките на Израел на окупираните палестински територии.

Јужноафриканската Република на крајот на декември поднесе тужба до МСП, обвинувајќи го Израел за геноцид во Појасот Газа и побара од судот итни мерки.

Судот во Хаг во јануари му нареди на Израел да ги преземе сите мерки што се во негова моќ за да спречи акти на геноцид во Појасот Газа, но не нареди прекин на огнот.

Исто така, му нареди на Израел да преземе итни и ефективни мерки за да овозможи испорака на итно потребните основни услуги и хуманитарна помош за Појасот Газа.