Израел уби уште 11 Палестинци во воздушен напад врз шатори во јужна Газа

ГАЗА (АА) - Најмалку 11 Палестинци, меѓу кои и жени и деца, се убиени рано утрово во израелски воздушен напад врз шатори на раселените Палестинци во јужниот дел на Појасот Газа, јавува Анадолу.

Воздушниот напад е извршен во подрачјето на Ал-Маваси во градот Кан Јунис, изјави медицински извор, додавајќи дека меѓу убиените има три жени и четири деца.

Подрачјето на Ал-Маваси е означено од Израел како „безбедна хуманитарна зона“. Меѓутоа, израелските воени авиони и беспилотни летала многупати спроведоа напади во областа, вршејќи масакри и убивајќи стотици луѓе.

Во централниот дел на Појасот Газа хеликоптери на израелската армија отворија оган кон западните делови на градот Деир ал-Балах, а израелски чамци отворија оган кон северните и западните делови на бегалскиот камп Нусејрат, рекоа очевидци.

Израелската артилерија, исто така, продолжи да ги гаѓа населбите Зејтун и Ал-Сабра во јужниот дел на градот Газа.

Очевидци за Анадолу изјавија дека израелската армија продолжила со бомбардирање на куќите и зградите во областа Ал-Сафтави во северниот дел на градот Газа и во Џабалија во северна Газа.

И покрај резолуцијата на Советот за безбедност на Обединетите нации со која се повикува на итен прекин на огнот, израелската армија ја продолжи геноцидната војна во Газа во која се убиени над 45.550 Палестинци, главно жени и деца, од нападот на Хамас на 7 октомври 2023 година.

Во ноември Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите постапки во енклавата.