Заврши првиот ден од мировните преговори помеѓу Русија и Украина во Истанбул

ИСТАНБУЛ (АА) - Денес во Истанбул заврши првиот ден од новата рунда мировни преговори помеѓу Русија и Украина со посредство на Турција, јавува Агенција Анадолија (АА).

Дводневните мировни преговори се одржаа во Претседателскиот кабинет во Долмабахче.

Руските и украинските преговарачи пристигнаа во Истанбул вчера.

Пред преговорите, претседателот на Турција, Реџеп Таип Ердоган, го повтори неговиот повик за прекин на огнот во војната помеѓу Русија и Украина, од чиј почеток помина еден месец.

„Ние веруваме дека во праведниот мир нема губитници, дека долготрајниот судир не е во ничиј интерес“, рече Ердоган за руските и украинските преговарачи.

Претходно, Ердоган рече дека телефонските разговори со неговиот украински и руски колега продолжуваат во „поволна насока“.

Пред мировните разговори, претставниците на украинската и руската делегација, Дејвид Арахамија и Владимир Медински, одржаа средба еден на еден.

„Делегациите работат паралелно на целиот спектар спорни прашања“, напиша Подољак на Твитер, споделувајќи фотографија од средбата.

Рускиот милијардер Роман Абрамович исто така присуствуваше на преговорите. Тој одржа преговори во Москва и Лавов претходно овој месец во обид да биде посредник меѓу двете нации.

Рускиот олигарх остана надвор од листата за санкции на Вашингтон поради неговите напори како посредник, според американските медиуми.

Претходно, „Волстрит џурнал“ тврдеше дека Абрамович, заедно со украинските мировни преговарачи, претрпел сомнително труење во Киев, додека украинската страна ги негираше наводите, велејќи дека преговарачите работат нормално.

- Украина вели 'дека се тешки преговорите за мир' -

Додека делегациите паузираа од разговорите за ручек, Подољак на Твитер ги коментираше преговорите.

„Безусловни безбедносни гаранции за Украина, прекин на огнот, ефективни одлуки за хуманитарните коридори и хуманитарните конвои, почитување на правилата и обичаите на војување од страните“, напиша тој.

„Тешки беа преговорите за мир во нашата земја. Во моментов во Истанбул“, додаде тој.

Неколку рунди преговори помеѓу Русија и Украина се одржаа во Белорусија досега, вклучително и видеоконференција на 14 март, но без постигнати конкретни резултати, сè уште.

Иако страните не се согласија да постигнат договор за прекин на огнот, тие се согласија да ги продолжат преговорите.

Русија ја започна војната против Украина на 24 февруари. Тоа наиде на остра меѓународна осуда, а ЕУ, САД и Велика Британија, меѓу останатите, воведоа строги санкции кон Москва.

Според Обединетите нации, досега во војната во Украина животот го загубиле најмалку 1.151 цивил, а 1.842 се повредени.

Над 3,87 милиони Украинци пребегаа во различни европски земји, а милиони се раселени во внатрешноста на земјата, според Агенцијата за бегалци на ОН.