ЕУ ја смета Русија одговорна за ракетниот напад на Полска

АНКАРА (АА) - Шефот за надворешна политика на Европската Унија, Жозеп Борел, процени дека Русија е одговорна за трагичниот ракетен инцидент во Полска, нарекувајќи го нападот грубо кршење на меѓународното право, пренесува Агенција Анадолија (АА).

„Овој трагичен инцидент е резултат на уште еден огромен бран ракетни напади врз украински градови од страна на Русија, насочени кон цивилите и цивилната инфраструктура. Овие напади се грубо кршење на меѓународното право“, се вели во соопштението на Борел.

„Русија продолжува да шири дезинформации за неоправданата и непредизвикана војна што ја води против Украина. Ќе продолжиме да ја повикуваме Русија за нејзината манипулација со информации и мешање“, додаде Борел.

Повикувајќи ја Русија да ја прекине својата „нелегална војна“, тој рече дека ЕУ „ќе остане цврста во нејзината поддршка за независноста, суверенитетот и територијалниот интегритет на Украина и нејзиното природно право на самоодбрана од руската агресија како што е содржано во Повелбата на ОН“.

„Европа ќе продолжи да обезбедува силна политичка, воена, хуманитарна и финансиска поддршка на Украина сѐ додека е потребно“, нагласи Борел.

„Русија, сите сторители и соучесници ќе одговараат“, додаде тој.

Борел, исто така, изрази солидарност со Полска и полскиот народ и изрази сочувство до семејствата на двете жртви на нападот.

„ЕУ целосно ја поддржува тековната истрага на Полска за утврдување на фактите на теренот, а ние ќе останеме во близок контакт со нашите партнери, вклучително и со НАТО, за следните чекори“, истакна тој.

Во вторникот вечерта падна проектил во селото Пржеводов, источна Полска, кое се наоѓа во близина на границата со Украина.

Инцидентот предизвика страв од ескалација помеѓу Русија и НАТО, чија членка е Полска.

Генералниот секретар на НАТО, Јенс Столтенберг, рече дека првичната анализа сугерира дека „најверојатно експлозијата е предизвикана од украинска ракета за воздушна одбрана истрелана за одбрана на украинската територија“, теорија која ја поддржува и Полска.