Низ Украина се огласија сирени за предупредување од напади

ИСТАНБУЛ (АА) - Сирени за тревога поради руските напади одекнаа утринава низ Украина, вклучувајќи го и главниот град Киев, пренесува Агенција Анадолија (АА).

Локалните власти преку Телеграм ги повикаа жителите да заминат во засолништата за да се заштитат од бомбите, додека гувернерот на Миколаив, Виталиј Ким, рече дека четири ракети биле лансирани во воздух.

„Украина веќе ги издржа најтешките непријателски напади, кои ги немаа резултатите што ги очекуваа овие руски кукавици. Продолжуваме да одиме напред“, напиша на Телеграм Андриј Јермак, шеф на Кабинетот на претседателот.

Украинскиот пратеник Олексеј Гончаренко изјави дека експлозии се слушнале во подрачјето на Днепар и во Киев.

Државната новинска агенција „Укринформ“ објави дека подрачјето на Днепар претрпело прекин на струја по експлозијата.

Подоцна, заменик-шефот на канцеларијата на украинскиот претседател Кирило Тимошенко изјави дека две инфраструктури неколкупати биле погодени со гранатирање.

„Непријателот изврши ракетен напад врз инфраструктурен објект во нашиот регион. Постои закана од масовен ракетен напад на целата територија на Украина. Ги молам жителите на регионот да останат во засолништата“, рече гувернерот на Одеса, Максим Марченко на Телеграм.

Не се издадени никакви предупредувања во регионот на Крим, кој Русија незаконски го анектира во 2014 година.

Во Украина речиси секојдневно се огласуваат сирени за предупредување од можни ракетни напади и напади со беспилотни летала кои се вршат врз цивилната и енергетската инфраструктура.

Сирените одекнаа денеска откако во вторникот во Киев беа погодени три станбени згради, при што загина еден цивил.

Официјални лица, исто така, соопштија за експлозии во повеќе градови, вклучувајќи ги Ривне, Лавов, Виниција и Ковел.