Ердоган разговараше со челниците на Малезија и Катар за израелските напади врз Палестинците

АНКАРА

Турскиот претседател, Реџеп Таип Ердоган, телефонски разговараше со челниците на Малезија и Катар за израелските напади врз Палестинците, јавува Агенција Анадолија (АА).

Во соопштението од Кабинетот на турскиот претседател се наведува дека Ердоган со кралот на Малезија, Абдулах Ри'ајатудин ал-Мустафа Билах, разговарал за билатералните односи и за нападите на Израел врз џамијата „Ал-Акса“ и Палестинците.

Ердоган за време на разговорот изјавил дека „треба да бидат едно срце и еден глас против насилството и тираниите на Израел врз Палестинците“.

Тој напомена дека верува оти Турција и Малезија блиску ќе соработуваат за тоа прашање на сите меѓународни платформи, првенствено во Обединетите нации (ОН) и Организацијата за исламска соработка (ОИС).

Ердоган денес телефонски разговараше за израелските напади врз џамијата „Ал-Акса“ и Палестинците и со катарскиот емир Тамим бин Хамад ал-Тани.

Турскиот претседател во таа прилика истакна дека се многу важни активностите што Турција и Катар заедно ќе ги преземат, со цел мобилизација на земјите од регионот и меѓународната заедница против нападите на Израел врз Кудс (Ерусалим), џамијата „Ал-Акса“ и Палестинците.