ИСТАНБУЛ (АА) - Двајца Палестинци, од кои едно малолетно лице, се убиени рано утринава од оган на израелската војска во Кафр Акаб, каде што најсеверниот Источен Ерусалим се среќава со Западниот Брег, пренесува Андолу.

Тимовите на Палестинското друштво на Црвената полумесечина санираа две критични повреди предизвикани од боева муниција за време на израелскиот напад врз Кафр Акаб, а двете лица беа пренесени во болница, објави палестинската новинска агенција Вафа.

Палестинското Министерство за здравство ја објави смртта на 18-годишниот Амр ал-Марбу и 16-годишниот Сами Машаик, кои им подлегнале на повредите добиени од израелскиот оган, објави агенцијата подоцна.

Израелските сили го нападнаа Кафр Акаб, распоредија пешачки патроли по улиците и поставија снајперисти на покривите на неколку згради, пред да отворат оган врз младите мажи, објави Вафа.

Израелската армија ги засили нападите врз окупираниот Западен Брег од почетокот на војната во Газа во октомври 2023 година.

Оттогаш се убиени најмалку 1.078 Палестинци, а 10.700 се повредени во нападите од армијата и од нелегалните доселеници на окупираната територија.

Приведени се и повеќе од 20.500 лица.

Меѓународниот суд на правдата ја прогласи окупацијата на палестинската територија од страна на Израел за нелегална и повика на евакуација на сите населби на Западниот Брег и Источен Ерусалим.