Гриво, кандидатот за градоначалник на Париз на владејачката партија во Франција, ја повлече својата кандидатура

ПАРИЗ

Бенжамен Гриво, кандидат за градоначалник на Париз од владејачката партија „Република напред“ (LREM), ја повлече својата кандидатура за локалните избори што ќе се одржат следниот месец во Франција, поради некои снимки од неговиот приватен живот што се појавија на интернет, јавува Агенција Анадолија (АА).

Гриво, кој беше поранешен портпарол на Владата, истакна дека повеќе од една година добивал навредливи пораки за него и за неговото семејство и смртни закани.

Наведувајќи дека вчера на една веб-страница биле објавени снимки за неговиот приватен живот, Гриво рече дека тоа е неприфатливо.

Гриво, нагласувајќи дека одлучил да ја повлече својата кандидатура за градоначалник на Париз, истакна дека неговиот приоритет е да го заштити своето семејство.

- Филип истакна дека ја почитува одлуката на Гриво

Во својата изјава, францускиот премиер Едуард Филип истакна дека ја почитува одлуката на Гриво и дека е во солидарност со него.

Во информациите објавени во францускиот печат се истакнува дека снимките со сексуална содржина и телефонските пораки на Гриво ги споделил на интернет рускиот уметник Пјотр Павленски, кој е обвинет за сексуално насилство врз жена.

Се очекува деновиве „Република напред“ (LREM) да го соопшти новиот кандидат за градоначалник на Париз.

Во Франција на 15 и 22 март ќе се одржат локални избори во два круга.

Гриво откако минатата година ја напушти функцијата владин портпарол беше назначен за кандидат за градоначалник на Париз.