Газа: Речиси 50 убиени, 200 повредени во израелски оган врз Палестинци кои дошле за хуманитарна помош

АНКАРА (АА) - Речиси 50 Палестинци се убиени, а над 200 се повредени денес кога израелските сили отворија оган врз цивилите кои дошле за хуманитарна помош во Ал Маваси, западно од Рафа во јужна Газа, соопшти Министерството за здравство, пренесува Анадолу.

Во соопштението на Министерството се вели дека телата на 28 лица се префрлени во болницата „Насер“ во градот Кан Јунис, а 21 во теренската болница на Црвениот крст, додека над 200 лица се повредени од израелскиот оган со боева муниција.

Според очевидци, голем број Палестинци се собрале рано утрово во центарот за дистрибуција на хуманитарна помош управуван од Хуманитарната фондација Газа, американска организација поддржана од Израел.

Додека луѓето се приближувале кон местото, израелските воени возила отвориле оган, а дронови пуштале експлозив, што резултирало со голем број жртви, додадоа тие.

Медицински претставник ја опиша ситуацијата околу дистрибутивниот центар како „исклучително опасна“, истакнувајќи дека амбулантните возила имале потешкотии да стигнат до повредените поради континуираното пукање. Некои жртви се евакуирани со помош на колички.

Истовремено, израелските сили отворија оган и врз цивилите кои се приближуваа кон друг американски центар за хуманитарна помош во близина на Коридорот Нецарим во централна Газа, изјавија очевидци.

Според медицински извори од болницата Ал-Авда во бегалскиот камп Нусејрат, најмалку еден Палестинец е убиен, а 20 повредени кога израелските сили отвориле оган врз толпите Палестинци во близина на бегалскиот камп Бурејџ.

Портпаролот на израелската армија, Авичај Адраи, рече дека нема информации за повредени од армискиот оган во центарот за дистрибуција на хуманитарна помош. Истакна дека наводите се истражуваат.

Службата за медиуми на владата во Газа го обвини Израел за „систематско и злонамерно користење на хуманитарната помош како оружје во војната за уценување на гладните цивили и нивно собирање во изложени зони за убивање“.

Израел изработи план за воспоставување четири пункта за дистрибуција на помош во јужна и централна Газа, за кои израелските медиуми велат дека имаат за цел да ги евакуираат Палестинците од северна Газа кон југ.

Според израелското Воено радио, планот на Израел за дистрибуција на хуманитарната помош има за цел да го претвори северниот дел од територијата во „целосно ненаселена област“.

Планот за хуманитарната помош поддржан од Соединетите Американски Држави (САД) се соочи со големи критики и отфрлање од Палестинците и меѓународните хуманитарни организации.

Од 2 март, Израел ги држи затворени сите гранични премини, прекинувајќи го влезот на храна, лекови, гориво и други основни залихи за 2,4 милиони жители на Газа.

Израел спроведува разорувачка офанзива во Газа од октомври 2023 година, во којашто се убиени речиси 54.400 Палестинци, повеќето од нив жени и деца. Агенциите за хуманитарна помош предупредија на ризик од глад кај повеќе од 2 милиони жители на енклавата.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за неговите воени злосторства врз цивилите во енклавата.