Во напад на израелски авиони на Џенин убиен Палестинец, шестмина повредени

АНКАРА (АА) - Еден Палестинец е убиен во воздушен напад на израелски борбен авион на бегалскиот камп Џенин во окупиран Западен Брег, известува Анадолу.

Министерството за здравство на Палестина соопшти дека во нападот се повредени уште шест лица кои се згрижени во две болници во Џенин.

Израелските медиуми, вклучително и информативната веб-страница „Ynet“, цитираа соопштение на израелската војска која тврди дека е извршен напад, според нив, врз палестинска вооружена ќелија, која наводно планирала да нападне израелска цел.

Употребата на израелски борбени авиони за гаѓање цели на Западниот Брег е ретка појава и обично се вршат копнени упади во градовите и подрачјата на Западниот Брег.

Тензиите се зголемуваат низ Западниот Брег откако Израел започна смртоносна воена офанзива против Појасот Газа по нападот на Хамас на 7 октомври 2023 година.

Оттогаш, околу 505 Палестинци се убиени, а повеќе од 4.900 се ранети во воени престрелки на окупираната територија, соопшти Министерството за здравство.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.