Цивилна заштита: Пронајдени тела на 93 Палестинци во кампот Џабалија

АНКАРА

Телата на најмалку 93 Палестинци се пронајдени во бегалскиот камп Џабалија во Појасот Газа од почетокот на израелската офанзива на кампот пред шест дена, известува Анадолу.

„Пожарите избувнаа во кампот Џабалија како резултат на континуираното израелско бомбардирање. Противпожарните екипи не можеа да стигнат до погодените области во кампот“, изјави за Анадолу Ахмед ал Кахлот, директор на Цивилната заштита во северниот дел на Појасот Газа.

Ал Кахлот информираше дека телата на 93 Палестинци се извлечени од кампот Џабалија.

„Многу тела беа фрлени на патиштата во кампот Џабалија, а тимовите не беа во можност да ги извлечат поради континуираното израелско бомбардирање“, додаде Ал Кахлот.

Израел започна брутална воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври.

Според палестинските здравствени власти, во израелските напади на Појасот Газа се убиени повеќе од 35.300 Палестинци, главно жени и деца, а повеќе од 79.200 се повредени.

По повеќе од седум месеци од почетокот на израелската војна, големи делови од Појасот Газа се во урнатини, а 85 отсто од населението на енклавата се внатрешно раселени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки хуманитарната помош да стигне до цивилите во Газа.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.