Mohammad Sıo
04 Март 2024•Ажурирај: 05 Март 2024
ИСТАНБУЛ (АА) - Најмалку 124 Палестинци загинаа, а 210 се повредени во последните 24 часа, при што Израел продолжува со нападите врз опколениот Појас Газа, соопшти денес Министерството за здравство на територијата, јавува Анадолу.
„Израелската окупација изврши 13 масакри врз семејства во Појасот Газа, убивајќи 124 Палестинци и ранувајќи 210 во текот на изминатите 24 часа“, се вели во соопштението на Министерството.
„Многу луѓе сѐ уште се заробени под урнатините и на патиштата бидејќи спасувачите не можат да стигнат до нив“, се вели во соопштението.
Израел продолжува со нападите врз Појасот Газа каде што најмалку 30.534 Палестинци се убиени, главно жени и деца, а 71.920 се повредени од 7 октомври, според палестинските здравствени власти.
Израел, исто така, наметна остра блокада на Појасот Газа, оставајќи го неговото население, особено жителите на Северна Газа, на раб на глад.
Според Обединетите нации, израелската војна во Газа принуди 85 отсто од населението внатрешно да се раселат, предизвика постојан недостиг на храна, чиста вода и лекови, а 60 отсто од инфраструктурата на енклавата се оштетени или уништени.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за да се гарантира влез на хуманитарната помош за цивилите во Газа.
Меѓутоа, непријателствата продолжија со ненамалено темпо, а испораките на помош и понатаму се недоволни за решавање на хуманитарната катастрофа.
