Во два израелски напади врз градот Газа загинаа најмалку 41 Палестинец

ГАЗА ГРАД (АА) - Во повеќемесечната офанзива на Израел во Газа, најмалку 41 Палестинец загинаа, а повеќемина се повредени денес во два одделни израелски напади врз градот Газа, јавува Анадолу.

Медицински извори изјавија за Анадолу дека израелската војска целела на куќа во населбата Ал-Туфах во источниот дел на градот Газа, при што загинаа 17 Палестинци, а повеќе се повредени.

Тие, исто така, соопштија дека уште 24 Палестинци загинале, а десетици се повредени во дополнително израелско бомбардирање на бегалскиот камп Ал Шати, во западниот дел на градот Газа.

Израелската војска бомбардираше три станбени згради во кампот, јави репортерот на Анадолу од терен.

Очевидци за Анадолу изјавија дека повеќе од 20 куќи во таргетираната област се целосно или делумно уништени како резултат на израелското бомбардирање.

Во меѓувреме, израелската војска тврди дека бомбардирала објекти што ги користел Хамас како воен штаб во градот Газа без да обезбеди никакви докази или дополнителни детали.

Непочитувајќи ја резолуцијата на Советот за безбедност на ОН со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Газа по нападот на Хамас на 7 октомври.

Оттогаш, над 37.500 Палестинци се убиени во Газа, од кои повеќето жени и деца, а повеќе од 85.900 се повредени, според палестинските здравствени власти.

Повеќе од осум месеци од почетокот на израелската војна, огромни делови од Газа се во урнатини, каде владее и блокада на храна, чиста вода и лекови.

Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине својата операција во Рафа, каде што повеќе од 1 милион Палестинци побараа засолниште од војната пред да започне копнената офанзива врз градот на 6 мај.