Британска пратеничка се соочува со 30-дневно суспендирање поради прекршување на мерките за Ковид-19 во 2020 година

ЛОНДОН (АА) – Британската пратеничка Маргарет Фериер се соочува со 30-дневна суспензија од Долниот дом на британскиот Парламент поради прекршување на мерките за Ковид-19 во 2020 година, јавува Анадолу.

Фериер зборуваше во Парламентот во септември 2020 година додека ги чекаше резултатите од тестот за Ковид. Откако добила позитивен резултат, таа тргнала со воз дома во Глазгов, и покрај мерките што беа на сила во тој период, кога таа како позитивна требало веднаш да се изолира.

Фериер беше исклучена од Шкотската национална партија, беше обвинета за изложување на јавноста на коронавирусот и казнета со 270 часа општествено корисна работа.

Таа се изјасни за виновна и безрезервно се извини за прекршувањето на ограничувањата поради Ковид-19, велејќи: „Нема оправдување за моите постапки.“

Одборот за следење на стандардите при Парламентот денес соопшти дека постапките на Фериер покажале „недостиг на чесност“, таа „свесно ги изложила другите на ризик“ и затоа препорачува таа „да биде суспендирана од функцијата во Парламентот на 30 дена“.

Суспендирањето може да доведе до дополнителни избори во нејзината изборна единица Ратерглен во Шкотска.

Според регулативата, секое суспендирање од 10 или повеќе денови може да го активира Законот за отповикување пратеници, што значи дека ако 10 отсто од избирачите потпишат петиција, ќе се одржат дополнителни избори.