Nur Asena Ertürk
30 Март 2023•Ажурирај: 31 Март 2023
АНКАРА (АА) - Синдикатите денес се собраа на протест против претседателот Емануел Макрон во југоисточна Франција, каде што тој ќе го открие новиот план за вода, јавуваат локалните медиуми, пренесува Анадолу.
Претседателот ќе го посети градот Савин-ле-Лак и ќе го открие планот за подобро управување со водите, соопшти француското Претседателство, пишува весникот „Фигаро“.
„Членовите на синдикатите се собраа во Савин-ле-Лак за пристигнувањето на Макрон и мирно скандираат додека полициските единици обезбедуваат“, објави телевизијата БФМТВ.
Групата е тука за да го изрази, уште еднаш, отфрлањето на владината пензиска реформа.
Владата го откри проектот за реформи во јануари, а милиони работници оттогаш изразија зголемен бес со одржување на демонстрации.
Проектот за реформи вклучува зголемување на старосната граница за пензионирање од 62 на 64 години до 2030 година, и бара најмалку 43 години работа за да се стекне правото на целосна пензија.
Во придружба на претседателот Емануел Макрон ќе бидат министерот за еколошка транзиција, Кристоф Бечу, и министерот за земјоделство, Марк Фесно, соопшти „Фигаро“.
Планот има за цел да ја подготви Франција за летото во кое властите стравуваат од големи суши поради недостигот на врнежи, додаде истиот извор.
„Франција е во 'состојба на тревога' поради ризикот од суша ова лето“, изјави Бечу на 22 февруари. Потоа тој се состана со локалните власти за да разговара за ситуацијата.
Француската метеоролошка управа „Метео франс“ на 22 февруари соопшти дека земјата забележала историска тешка суша оваа зима, без врнежи 32 дена од 21 јануари.
„Таквата состојба предизвикува сушење на почвата, која веќе беше ослабена од сушата летото 2022 година“, се вели во соопштението.
Бирото за геолошки и рударски истражувања на 13 март соопшти дека нивото на подземните води е под месечната норма од 1 март поради недостаток на врнежи во февруари.
