Блинкен: „Не можеме да воспоставиме зона на забрана на летови во Украина, со тоа ризикуваме војна со Русија“

БРИСЕЛ (АА) - Американскиот државен секретар Ентони Блинкен изјави дека не е можно да се воспостави зона на забрана на летови во Украина поради ризикот од војна со Русија, јавува Агенција Анадолија (АА).

По разговорите со претставниците на Европската Унија (ЕУ) во Брисел, Блинкен рече дека руските напади во Украина сè повеќе предизвикуваат цивилни жртви.

„Светот виде какви тактики користи Русија“, нагласи Блинкен.

Тој го коментираше и прашањето за односите меѓу Русија и Западот по руските напади на Украина.

„Русија денес е поизолирана од кога било досега, а ние сме пообединети од кога било досега“, истакна Блинкен.

Тој рече дека нападот на руските сили врз нуклеарната централа „Запорожје“ во Украина е исклучително опасен чекор.

„Русија треба веднаш да ги прекине нападите врз нуклеарната централа и да му даде можност на цивилниот персонал да ги извршува своите должности“, рече Блинкен.

Тој се осврна и на прашањето за воспоставување зона на забрана на летови над Украина.

„Имаме одговорност кон украинскиот народ, како и да обезбедиме оваа војна да не се прошири надвор од Украина. Единствениот начин на кој навистина можете да имплементирате нешто како зона на забрана на летови е да ги испратите авионите на НАТО во украинскиот воздушен простор и да ги соборувате руските авиони, што би можело да доведе до целосна војна. Не сакаме да влегуваме во војна со Русија, како што јасно кажа и претседателот Џо Бајден“, појасни Блинкен.

Напоменувајќи дека во изминатата година пружиле околу 1 милијарда долари одбранбена помош за Украина и дека неодамна најавија 350 милиони долари помош за одбраната, Блинкен рече дека сакаат да му помогнат на народот на Украина.

„Правиме сè за да можат Украинците да ја бранат својата земја“, рече тој.

Блинкен, исто така, нагласи дека во Украина неодамна е испорачано оружје во вредност од околу 250 милиони долари.

Нападот на Русија врз Украина, што започна на 24 февруари, предизвика гнев кај меѓународната заедница, а Европската Унија, Велика Британија, Канада, Јапонија и Соединетите Американски Држави (САД) воведоа економски санкции кон Москва. Москва е дополнително изолирана бидејќи на нејзините авиони им е забрането да го користат европскиот, американскиот и канадскиот воздушен простор.