Билансот на убиени Палестинци во Газа се приближува до 40.000, во изминатото деноноќие убиени 32 лица

АНКАРА (АА) - Најмалку уште 32 Палестинци се убиени во израелските напади во Појасот Газа, што започнаа од 7 октомври, со што вкупниот број се искачи на 39.929, соопшти денес Министерството за здравство во енклавата, јавува Анадолу.

Министерството додаде дека во нападите повредени се најмалку 92.240 Палестинци.

„Израелските сили убија 32 лица и повредија 88 во два масакри врз семејства во последните 24 часа“, соопшти Министерството.

Се додава дека многу луѓе сè уште се заробени под урнатините и на патиштата бидејќи спасувачите не можат да стигнат до нив.

Не почитувајќи ја резолуцијата на Советот за безбедност на ОН со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Газа од нападот на палестинската група Хамас на 7 октомври 2023 година.

Повеќе од десет месеци од почетокот на израелската војна, огромни делови од Газа се во урнатини, каде постои блокада на храна, чиста вода и лекови.

Израел е обвинет за геноцид пред Меѓународниот суд на правдата, кој му нареди на Тел Авив веднаш да ја прекине својата воена операција во јужниот град Рафа, каде над милион Палестинци побараа засолниште од војната пред да започне копнената офанзива врз градот на 6 мај.