Бајден ја укина забраната за патување од муслиманските земји

ВАШИНГТОН

Американскиот претседател Џо Бајден денеска ја укина забраната за патување од неколку земји со муслиманско мнозинство, која претходно беше воведена од Трамп, за која новата администрација рече дека претставува дискриминирање, јавува Агенција Анадолија (АА).

Бајден ја потпиша извршната наредба во Овалната соба откако положи заклетва дека ќе биде 46. претседател на земјата.

Тој изјави дека САД „се изградени врз основа на верска слобода и толеранција, принцип вграден во Уставот на земјата".

Трамп ја воведе забраната во март 2017 година со извршна наредба проследена со проглас за можности за проверка и процеси, повикувајќи се на можен обид за влез на „терористи“ или „закани за јавната безбедност“, во потег да се спречат поединци да влегуваат во САД од муслиманските земји, а потоа и од неколку други африкански нации.

„Нашата национална безбедност ќе се зајакне со укинување на извршната наредба и прогласите“, изјави Бајден, кој им нареди на сите американски амбасади и конзулати да продолжат со обработка на визи на начин во согласност со овој потег.

„Рестрикциите беа вкоренети во религиозната омраза и ксенофобија“, изјави портпаролката на Белата куќа, Џен Псаки, за новинарите.

Советот за американско-исламски односи (CAIR) го поздрави потегот, нарекувајќи го „важен прв чекор кон откажување на антимуслиманската и антиимигрантската политика на претходната администрација“.

„Тоа е важно исполнување на заложбата за кампања кон муслиманската заедница и нејзините сојузници“, рече Нихад Авад, шефот на најголемата организација за граѓански права на муслиманите во нацијата.