Ikrame Imane Kouachi,Mahmoud Mohamed Barakat
11 Ноември 2023•Ажурирај: 16 Ноември 2023
РАМАЛА (АА) - Палестинското Министерство за здравство денес соопшти дека 39 бебиња од Одделението за нега во болницата Ал-Шифа во Газа се во опасност од смрт во секое време поради недостиг на кислород, што коинцидира со тешките воздушни и артилерски напади на болницата и нејзината околина од страна на израелските сили, јавува Анадолу.
Министерството за здравство издаде соопштение со кое ја коригира претходната изјава на својата министерка Маи Ал-Каила во која таа рече дека 39 бебиња во Одделението за интензивна нега на болницата Ал-Шифа починале поради недостиг на кислород.
Мухамед Алававда, менаџер за медиуми во Министерството за здравство, за Анадолу изјави дека 39 деца на Одделот за нега во болницата Ал-Шифа се во опасност од смрт, а едно бебе починало како резултат на недостигот на кислород.
Претходно, Каила на прес-конференција изјави дека „Израел врши воено злосторство и геноцид во Појасот Газа“, и додаде дека „врши опсада и бомбардира болници“.
„По ѓаволите со меѓународната заедница која не може да ја запре машинеријата на уништување и убивање болни и ранети во болниците преку директен пренос пред сиот светот“, рече министерката.
Таа нагласи дека: „Израел ги опколува болниците со тенкови наместо да им обезбеди гориво, лекови и залихи, а резултатот е сигурна смрт за илјадниците пациенти и ранети“.
Министерката посочи дека 20 од 35-те болници се вон функција поради израелските бомбардирања и недостигот на гориво.
Соопшти дека болницата Ал-Наср е директно бомбардирана, со што е уништен Одделението за бебиња и дека погодени се и панелите за соларна енергија, што довело до прекин на струјата и водата.
Каила апелираше до меѓународната заедница итно да интервенира, да ја укине опсадата на болниците и да ја прекине војната за да ги спаси животите на илјадници жители.
