Азербејџанските сили го одбија обидот на ерменската Војска повторно да ги окупира ослободените населби

БАКУ (АА) - И покрај прогласеното примирје, ерменските сили во повеќе наврати се обидоа да извршат нови напади на територијата на Азербејџан, што азербејџанската Војска го спречи, пренесува Агенција Анадолија (АА).

Министерството за одбрана на Азербејџан утринава соопшти дека ерменските сили во текот на изминатата ноќ се обиделе да извршат напади и повторно да окупираат повеќе места коишто азербејџанските сили во текот на претходните денови ги ослободија во регионите Агдере, Агдам, Фузули и Џебраил.

Во соопштението се наведува дека азербејџанските сили за време на спречувањето на ерменските напади неутрализирале ерменски тенк „T-72“, три ракетни системи „Град“ и повеќе припадници на ерменската Војска.

Од Баку, исто така, известија дека ерменските сили напуштиле некои позиции во близина на гратчето Хадруд и дека при бегството оставиле оклопни возила.

Од Министерството за одбрана на Азербејџан изјавија дека азербејџанските сили се во голема предност на сите фронтови во Нагорно Карабах.

Ерменските сили продолжија да извршуваат и напади врз цивилните населби. Такви напади се извршени во местата Агдам, Тертер и Горанбој.

Делегациите на Ерменија и Азербејџан во Москва постигнаа договор за примирје, што на сила стапи во саботата напладне. Целта на хуманитарниот прекин на огнот беше вршење размена на заробеници и на телата на загинатите војници.