Адвокатите на жртвите во Сирија бараат од МКС апсење на Асад и неговите соучесници

ДАМАСК (АА) - Адвокатите кои ги застапуваат жртвите во Сирија побараа од Меѓународниот кривичен суд (МКС) „итно“ да издаде налози за апсење на Башар ал-Асад и 17 високи функционери за воени злосторства и злосторства против човештвото, јавува Анадолу.

Во изјава по средбата со сириските власти, Ѓулден Сонмез и Џихат Ѓокдемир истакнаа дека започнале постапка во 2017 година во име на нивните клиенти, кои страдале од режимот на партијата Баас, за кривично гонење на Асад и високи воени и политички лица пред МКС во Хаг.

Нагласувајќи дека досиејата на жртвите се и понатаму отворени поради условите поврзани со сириската војна, Сонмез и Ѓокдемир рекоа: „Со падот на режимот на Башар ал-Асад на 8 декември 2024 година, злосторствата против човештвото и воените злосторства извршени од страна на Асадовиот режим беа обелоденети пред светот“.

Адвокатите побараа брза акција. „Го повикуваме обвинителот на МКС од Дамаск итно да издаде налози за апсење на Башар ал-Асад и високи функционери врз основа на постоечките досиеја за случајот“.

- Повик за истрага и правда -

Сонмез и Ѓокдемир побараа од МКС да испрати делегација во Сирија за истрага на терен.

„Во оваа ужасна војна, обележана со систематско мачење, силување и употреба на хемиско и друг вид оружје за масовно уништување, мора итно да се започнат судења на воените злосторници за да се обезбеди правда за жртвите“, се вели во соопштението.

Тие, исто така, повикаа институциите, невладините организации и поединците со докази за злосторствата на режимот да споделат информации или да се вклучат во случајот пред МКС.

„Отворени сме за сите форми на соработка за да се обезбеди правда“, рекоа адвокатите, повикувајќи на петиции и докази за зајакнување на случајот.

- Следни чекори -

Говорејќи пред зградата на судот во Дамаск, Сонмез рече дека нивниот тим поминал 10 дена во Сирија, запознавајќи ги жртвите и запознавајќи се со нивните искуства од прва рака.

„Ќе се вратиме во Истанбул, а потоа ќе продолжиме во Хаг со нашата делегација меѓународни адвокати за да преземеме чекори за апсење на Асад и другите сторители“, рече Сонмез.

Башар ал-Асад, кој владееше со Сирија речиси 25 години, побегна во Русија откако антирежимските сили го зазедоа Дамаск на 8 декември, ставајќи крај на шестдецениското владеење на партијата Баас.

Падот на режимот уследи по молскавичната офанзива на борците на Хајат Тахрир ал-Шам, кои ги зазедоа клучните градови за помалку од две недели.