Агенција на ОН: Десетици илјади бремени жени и доилки во Газа се соочуваат со екстремен глад

АНКАРА (АА) - Фондот на Обединетите нации за популациски активности (УНФПА) предупреди дека десетици илјади бремени жени и доилки во Појасот Газа се соочуваат со сериозен глад, со што се предизвикуваат погубни последици за новороденчињата, јавува Анадолу.

Регионалната канцеларија на УНФПА за арапски држави на Х соопшти дека околу 50.000 бремени и доилки „не јаделе со денови“.

Според агенцијата, бебињата се раѓаат предвреме и со премала тежина, неисхранетоста на мајките оневозможува доење, а повеќе не е достапна бебешка храна.

„Новороденчињата се изложени на ризик од смрт или трајни здравствени последици“, додаде УНФПА.

Агенцијата оцени дека ситуацијата може да се спречи и повика на итен хуманитарен пристап до Појасот Газа, истакнувајќи го апелот со хаштагот „#Отворете ја Газа, нека влезе хуманитарна помош“.

Според агенциите на ОН, хуманитарниот пристап до Газа и понатаму е ограничен, со што дополнително се зголемува кризата за ранливите категории, особено жените и децата.

УНФПА и други меѓународни организации продолжуваат да апелираат до сите релевантни страни да овозможат доставување помош заради спасување животи.

И покрај меѓународните повици за прекин на огнот, израелската армија уби речиси 57.600 Палестинци во смртоносната офанзива во Појасот Газа од октомври 2023 година.

Безмилосното бомбардирање ја уништи енклавата и создаде недостиг на храна и ширење на болести.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна против енклавата.