Австралија: Се преврте автобус со сватови, загинаа 10 лица

КАНБЕРА (АА) - Најмалку 10 лица загинаа, а 25 се повредени во автобуската несреќа што вчера се случи во Нов Јужен Велс, Австралија, објави денес полицијата, пренесува Анадолу.

Австралиските медиуми пренесоа дека автобусот со 39 патници се превртел кај кружен тек. Автобусот превезувал сватови кои се враќале од венчавка што се одржала во источниот дел на земјата.

Несреќата се случила во близина на градот Грета во Нов Јужен Велс, во регионот Хантер, северно од Сиднеј.

Медиумите пренесуваат дека местото за време на несреќата било обвиено со густа магла, која ја намалила видливоста на патот.

Повредените се префрлени во околните болници. Меѓу повредените е и 58-годишниот возач на автобусот, кој е приведен.

Власта започна истрага за автобуската несреќа, која се смета за најсмртоносна во Австралија во последните неколку години.