Авганистан започна со својот прв меѓународен комерцијален лет откако талибанците ја презедоа контролата

КАБУЛ (АА) - Авион на пакистанската национална авиокомпанија слета денес на Меѓународниот аеродром „Хамид Карзаи“ во Кабул, продолжувајќи ги меѓународните летови кон Авганистан, откако талибанците ја презедоа контролата минатиот месец, се вели во соопштението на авиокомпанијата, пренесува Агенција Анадолија (АА).

„Летот донесе група меѓународни новинари во Кабул и се врати со претставници на Светската банка и некои новинари“, изјави извршниот директор на ПИА, Аршад Малик, нарекувајќи го летот „многу важен“.

Тој, исто така, изрази надеж дека услугата за летови до Кабул ќе биде целосно обновена наскоро.

„Целта на летот е да се промовира добра волја меѓу Пакистан и Авганистан и да се зајакне операцијата врз основа на хуманитарни симпатии“, се додава во соопштението.

„Тоа беше изнајмен авион, што донесе тројца новинари од Исламабад и полета назад со 65 патници“, изјави претставник на ПИА во Кабул.

Во неделата, привремената талибанска администрација ги отповика безбедносните и другите лица што работеа на аеродромот во Кабул пред 31 август, денот кога американските сили ја напуштија земјата.

Кога талибанците ја презедоа контролата врз Кабул на 15 август, меѓународните комерцијални летови беа прекинати, додека американските сили, како што беше истакнато, го оштетиле аеродромот, вклучувајќи ги и авганистанските национални авиони, хангари и канцеларии, пред целосно да се повлечат од земјата на 31 август.

По повлекувањето на американските сили, техничките тимови на Катар и Турција следниот ден пристигнаа за да помогнат во обновувањето на аеродромот за да може повторно да се отвори.