АНКАРА
Податоците во документите што припаѓаат на француските институции, а до кои дојде Агенција Анадолија (АА), открија дека француската компанија и најголем светски гигант во производството на цемент „Лафарж“ редовно ги известувала француските домашни, странски и воени разузнавачки служби за својот однос со терористичката организација ДЕАШ, и дека за тој однос била информирана и државата Франција, известува Агенција Анадолија (АА).
Агенција Анадолија (АА) дојде до документи кои го потврдуваат односот помеѓу ДЕАШ и „Лафарж“, кој беше под истрага и обвинет за „учество во злосторства против човештвото“, со образложение дека на ДЕАШ му доделил средства за активности во Сирија. Документите потврдуваат дека сè е направено со знаење на француската држава.
Во документите исто така се наоѓаат и информациите дека Француската разузнавачка служба, која ја користела Лафаржеовата мрежа на односи за прибирање информации од регионот, со цел да соработува со терористичките организации во Сирија и да врши свои активности, не ја предупредила компанијата дека тоа што го прави претставува кривично дело.
- Компанијата побарала поддршка од Француската разузнавачка служба
Од документите што ѝ припаѓаат на француската држава, до кои дојде АА, се подразбира дека односот меѓу компанијата „Лафарж“ и Француската разузнавачка служба започнал преку е-пошта што директорот на компанијата за безбедност, Жан-Клод Вејар, ја пратил на 22 јануари 2014 година на адресата што ѝ припаѓа на раузнавачката служба на Министерството за внатрешни работи.
Вејар во својот е-маил наведува дека „Лафарж“ сè уште е активна во Сирија и дека мора да воспостави односи со „локалните актери“ за да може да продолжи со својата работа. Директорот за безбедност ја запрашал разузнавачката служба под колкав ризик се нивните менаџери и седиштето, напоменувајќи дека за нив постојат негативни извештаи за медиумите.
Одговарајќи му на „Лафарж“, службеникот на разузнавачката служба го известил за датумот на разговорот во врска со настанатата ситуација.
- Француските разузнавачки служби имале корист од „Лафарж“
По скандалозната расправа во Франција за односите на „Лафарж“ и терористичката организација, како и судскиот епилог, разузнавачкиот службеник под кодно име АМ 02 пред судот дал изјава на 18 ноември 2018 година.
Според транскриптот, службеникот признал дека „Лафарж“ била негов извор на информации во Сирија, и му раскажал на судијата дека француските разузнавачките тајни служби ја искористиле компанијата „Лафарж“.
Во транскриптот се наведува дека разузнавачкиот службеник изјавил дека во периодот 2012 - 2014, „Лафарж“ испраќала цемент на сите вооружени групи во Сирија (вклучувајќи го и фронтот Нусра), не исклучувајќи го ниту ДЕАШ.
„На ситуацијата пријдовме чисто опортунистички, искористувајќи ја континуираната работа на Лафарж“, наведе службеникот.
- Со знаење на Француската разузнавачка служба
Детали за испраќањето цемент на ДЕАШ се наоѓаат во преписката од 1 септември 2014 година меѓу директорот за безбедност на „Лафарж“, Вејар, и разузнавачката служба на француското Министерство за внатрешни работи.
„Можете ли да дадете повеќе детали за цементот што оди за ДЕАШ?“, е прашање што било испратено од Француската разузнавачка служба, од кое е јасно дека француската држава била свесна за односот на „Лафарж“ со терористичката организација во тоа време.
Според документите до кои дојде АА, важно е да се напомене дека само во периодот од 2013 до 2014 година имало повеќе од 30 состаноци меѓу „Лафарж“ и француските домашни, странски и воени разузнавачки служби.
Познато е дека ДЕАШ изгради цврсти засолништа и тунели за борба против силите на Коалицијата предводени од САД, со цементот што им е осигуран.
- „Лафарж“ им ги пренела на француските разузнавачи информациите до кои дошол
Вејар, шефот на безбедносната компанија, сослушан е во полицијата на 30 ноември 2017, во време кога „Лафарж“ е обвинета за учество во злосторства против човештвото со финансирањето на терористичката организација.
Во транскриптот се наведува дека Вејар во својата изјава се обидел да докаже дека ги известил француските државни и разузнавачки агенции за сè што сторил.
Додатоците во неговата изјава вклучуваат документи во врска со информациите за разговорот со Лафаржовиот безбедносен менаџер на терен, за условите развиени на теренот и за она што го научил.
Се разбира дека Вејар на француските разузнавачи им пренесувал теренски податоци за судирите и воената рамнотежа меѓу вооружените групи.
Во еден од документите пронајдена е белешката што Вејар ја напишал во октомври 2013, а на која пишува „Пратено на француските странски разузнавачки служби (DGSE)“.
- Ќе се прикријат ли откриените податоци?
Во Франција во 2016 година објавени се информациите дека „Лафарж“ ја финансирала терористичката организација ДЕАШ во граѓанската војна во Сирија.
Според француските медиуми, компанијата, со цел да ги продолжи своите активности во регионот Џелебија, освен парични средства на ДЕАШ, од терористичката организација набавувала гориво и материјали.
Иако компанијата призна дека во 2017 година им плаќала на вооружените групи на сириското тло со цел фабриката да остане отворена, таа ги негираше обвинувањата за „учество во злосторства против човештвото“.
Осум раководители на компанијата, меѓу кои и двајца високи функционери, се соочиле со истрагата и обвинети се за финансирање тероризам и соработка во злосторства против човештвото.
Обвинението за „учество во злосторства против човештвото“ подигнато е против компанијата во јуни 2018 година, а отфрлено е во ноември 2019.
Невладините организации кои реагираа на отфрлањето на обвинението, го пренесоа тоа прашање до Врховниот суд на Франција.
Се очекува Врховниот суд на Франција денес да донесе одлука што ќе го отвори или ќе го затвори патот „Лафарж“ да биде обвинета за соучество во злосторства против човештвото и финансирање на терористите на ДЕАШ.
