„Холандија мора да престане да му доставува делови за авионот Ф-35 на Израел поради кршење на меѓународното право“

ЛОНДОН (АА) - Холандија мора да ја запре испораката на делови од борбени авиони Ф-35 на Израел, кој е обвинет за геноцид, во рок од седум дена, наложи денес холандскиот Апелационен суд, јавува Анадолу.

Одлуката следуваше откако судот ја усвои жалбата на организациите за човекови права кои тврдат дека испораката на деловите придонела за „кршење на меѓународното право од страна на Израел“ во неговата војна со Хамас.

„Судот ѝ нареди на државата да го прекине целиот извоз и транзит на делови од Ф-35 во Израел во рок од седум дена од доставувањето на оваа пресуда“, соопшти судот.

Делови од Ф-35, произведени во Соединетите Американски Држави, се чуваат во Холандија.

По обвинението за геноцид поднесено од Јужноафриканската Република, Меѓународниот суд на правдата на 26 јануари донесе одлука дека Израел мора да се воздржи од какви било активности поврзани со убиства, напади и уништување на жителите на Газа и да ги преземе сите мерки за да го спречи геноцидот.

Меѓутоа, израелските сили продолжуваат да вршат напади во кои од 7 октомври досега загинаа најмалку 28.340 Палестинци, главно жени и деца, а беа ранети 67.984.