Servet Günerigök
30 Октомври 2022•Ажурирај: 31 Октомври 2022
ВАШИНГТОН (АА) – Соединетите Американски Држави (САД) жалат што Русија го суспендира нејзиното учество во операциите на Иницијативата за пренос на жито преку Црното Море, склучена со посредство на ОН, изјави американскиот државен секретар Антони Блинкен, јавува Агенција Анадолија (АА).
„Ги повикуваме сите страни да работат на задржување на функционирањето на оваа суштинска, спасувачка иницијатива“, се вели во изјавата на Блинкен, додавајќи дека договорот е клучно важен за земјите со низок и среден приход.
„Тоа беше успех и мора да продолжи“, додаде тој.
Блинкен ја обвини Москва дека повторно ја користи храната како оружје. „Секој чин од страна на Русија за попречување на овој клучен извоз на жито во суштина е порака дека луѓето и семејствата низ светот треба да платат повеќе за храна или да останат гладни“, рече тој.
Блинкен ја повика Русија да продолжи со своето учество во договорот.
Руското Министерство за одбрана претходно соопшти дека Русија го суспендира своето учество во договорот за извоз на украинско жито, по нападите врз нејзината Црноморска флота.
Руската Амбасада во Анкара на Твитер објави: „Со оглед на терористичкиот напад врз бродовите на Црноморската флота и цивилните бродови задолжени да ја гарантираат безбедноста на коридорот за жито во Киев, Русија го прекина учеството во договорите за извоз на земјоделски производи од украинските пристаништа.“
Критикувајќи го потегот на Русија, украинскиот претседател Владимир Зеленски рече: „Русија намерно почна да ја влошува кризата со храна уште во септември кога го блокираше движењето на бродовите со нашето (жито).
Во видеопораката објавена на Телеграм, Зеленски ја обвини Русија дека од септември се обидува да го спречи движењето на 176 бродови кои ги напуштаат украинските пристаништа во рамките на договорот за коридорот за жито.
Тој истакна дека тие носат храна за над 7 милиони потрошувачи, и додаде: „Некои бродови со жито чекаат повеќе од три недели.“
Туркије, ОН, Русија и Украина на 22 јули во Истанбул потпишаа договор за продолжување на извозот на жито од три украински пристаништа на Црното Море, што беше прекинат по почетокот на руско-украинската војна во февруари. Во Истанбул е формиран Заеднички координативен центар со официјални претставници од трите земји и ОН за надгледување на испораките.
