„Осаменоста и социјалната изолација го зголемуваат ризикот од смрт од рак за 34%“, покажува ново истражување

ЛОНДОН (АА) – Осаменоста и социјалната изолација го зголемуваат ризикот од смрт од рак за 34 %, покажува ново истражување објавено во списанието „BMJ Oncology”, јавува Анадолу.

Истражувањето, спроведено врз основа на податоци од над 1,5 милиони пациенти во рамките на 12 студии, открива дека осаменоста и изолацијата имаат значителни емоционални и психолошки последици што можат да влијаат врз напредувањето на болеста и стапката на преживување кај пациентите со рак.

Научниците наведуваат дека резултатите укажуваат на тоа дека социјалните фактори можат да влијаат на исходот на болеста надвор од традиционалните биолошки и терапевтски фактори.

„Биолошки гледано, одговорот на стрес предизвикан од осаменоста може да доведе до нарушување на имунолошкиот систем и зголемена воспалителна активност, што на крајот придонесува за напредување на болеста“, се наведува во истражувањето.

Ракот останува една од водечките причини за смрт во светот, со речиси 20 милиони нови случаи и 9,7 милиони смртни исходи во 2022 година.

Според глобалните здравствени податоци, овие бројки се очекува да пораснат на 35 милиони нови случаи и 18,5 милиони смртни случаи до 2050 година.