Aida Cako
16 Март 2026•Ажурирај: 17 Март 2026
ПОЈАС ГАЗА (АА) – Палестинска семејна куќа во населбата Шеик Радван во градот Газа, претворена во куп урнатини по израелските напади, годинава е местото за ифтар на семејството на Махер Абу Салим, јавува Анадолу.
Опкружени со урнати ѕидови и расфрлани остатоци, Абу Салим и неговото семејство се собраа околу скромна ифтарска трпеза на местото каде што некогаш се наоѓала нивната семејна куќа.
Тој вели дека нивниот дом бил уништен уште на почетокот на војната.
„Живеевме во нашата семејна куќа заедно со моите браќа. Одеднаш сè беше уништено и расфрлано“, рече тој, додавајќи дека во нападот загинал и неговиот татко.
Оттогаш семејството живее во шатор поставен во близина, каде што се соочува со тешки услови за живот.
„Животот во шатор е многу тежок, особено во текот на зимата, кога студот, ветерот и дождот дополнително ги влошуваат условите“, рече Абу Салим.
Тој нагласи дека пристапот до храна и вода за пиење најчесто зависи од дистрибуцијата на хуманитарна помош.
„Понекогаш одиме да земеме оброци од хуманитарната помош кога ќе пристигне, но понекогаш е на големо растојанието и не може да стигнеме дотаму“, додаде тој.
Кога помошта не е достапна, семејството подготвува храна од она што успева да го пронајде и го организира ифтарот на урнатините на својот поранешен дом.
„Животот е многу тежок, но нема друга алтернатива“, рече Абу Салим.
Според податоците на Министерството за здравство во Газа, од почетокот на прекинот на огнот израелската армија убила најмалку 658 Палестинци, а 1.754 лица се повредени.
Прекинот на огнот ја запре двегодишната војна на Израел во Појасот Газа, во која од октомври 2023 година се убиени повеќе од 72.000 Палестинци, речиси 172.000 се повредени, а уништени се близу 90 отсто од цивилната инфраструктура.
