Израелската армија расели 75 отсто од Палестинците од бегалскиот камп Тулкарем на Западниот Брег

ТУЛКАРЕМ (АА) – Израелската армија расели речиси 75 отсто од палестинските жители на бегалскиот камп Тулкарем за време на тековната воена операција на северниот дел од Западниот Брег, изјави локален официјален претставник денес, јавува Анадолу.

На 21 јануари израелската армија започна напад врз градот Џенин и неговиот бегалски камп, при што беа убиени најмалку 26 Палестинци. Подоцна офанзивата беше проширена и врз градот Тулкарем, каде што се убиени најмалку тројца Палестинци.

„Речиси 75 отсто од 15.000 жители на кампот беа присилно раселени во градот Тулкарем и соседните места“, изјави Фајсал Салама, претседател на Народниот комитет за услуги во кампот, за Анадолу.

Тој ја опиша ситуацијата во кампот Тулкарем како „екстремно тешка“.

Палестинските бегалци во кампот „живеат во ужасни услови бидејќи Израел го спречува влезот на лекови, храна и основни продукти“, објасни Салама.

Тој додаде дека израелската армија ја затворила и канцеларијата на Црвената полумесечина во кампот, лишувајќи ги Палестинците од какви било медицински услуги.

Ескалацијата на израелските напади врз Западниот Брег настана по договорот за прекин на огнот и размена на затвореници во Газа на 19 јануари, по 15-месечната израелската војна во која се убиени над 47.500 Палестинци и ја претвори енклавата во урнатини.

Од почетокот на израелската војна во Газа во октомври 2023 година беа убиени повеќе од 900 Палестинци во нападите од израелските сили и доселеници низ Западниот Брег.