„Ербас“ ќе го прекине производството во Франција и Шпанија

БЕРЛИН (АА) - Европскиот производител на авиони „Ербас“ соопшти дека четири дена ќе го прекине производството во своите фабрики во Шпанија и Франција, поради ограничувањата донесени во борбата против коронавирусот, пренесува Агенција Анадолија (АА).

Во соопштението на „Ербас“, се истакнува дека производните и монтажните активности на компанијата во нејзините фабрики во Франција и Шпанија ќе бидат запрени на четири дена, поради новите мерки на владите во овие земји за ограничување на патувањето, со цел да се забави ширењето на појавата на коронавирусот.

„Во овие земји „Ербас“ ќе ја зголеми работата од дома“, се вели во соопштението и се додава: „Овие (4 дена) се доволно време за поставување на строгите мерки за хигиена, чистота и социјална далечина. Во новите услови за работа ќе ја зголемиме и ефикасноста на производството.“

Градот Тулуз, лоциран во југозападниот дел на Франција, познат е како најголем авијациски центар во Европа. Во Тулуз се наоѓа и седиштето на компанијата, како и најголемите објекти на „Ербас“.