„Грција нема намера да влезе во трка за вооружување со Турција“

АТИНА (АА) - Грчкиот премиер Кирјакос Мицотакис изјави дека нема намера да влезе во трка за вооружување со Турција, пренесува Агенција Анадолија (АА).

Во ексклузивното интервју за грчкaта државна телевизиска мрежа ЕРT, Мицотакис, кој престојува во дводневна официјална посета на Париз, рече: „Предвидов пролетва дека ќе имаме тивко лето. Не гледам причина зошто не треба да имаме тивка есен и тивка зима. Верувам дека Турција разбира дека тензиите во Источниот Медитеран на крајот нема да бидат од полза за никого“.

Истакнувајќи дека со Турција може да се постигне соработка за заеднички прашања како што се климатската криза и проблемот со бегалците, Мицотакис нагласи дека економската соработка е можна како дел од добрососедските односи и почит.

Мицотакис рече дека единствениот начин да се решат проблемите во Источниот Медитеран и Егејското Море е меѓународното право.

„Ќе ви кажам искрено, може да се постигнат договори кои бараат заедничко повлекување назад за некои прашања за да можеме на крајот да постигнеме решенија од кои сите ќе имаат корист.“

Мицотакис ја нагласи и потребата од модернизација на грчката Армија.

„Не сум расположен за трка во вооружувањето со Турција. Тоа не е моја намера“, рече тој. „Бидејќи, знаете, ова се одлуки за програми за оружје кои имаат долг хоризонт. На мојот наследник ќе му предадам помоќни вооружени сили.“

Мицотакис рече дека одлуките донесени од Европскиот совет во врска со Источниот Медитеран ја донеле рамката на односите во Источниот Медитеран од европска призма и дека турско-грчките односи се претвориле во односи Турција-ЕУ.