Турскиот министер за одбрана: „Очекуваме Шведска и Финска да ги исполнат своите одговорности и заложби“

Министерот за национална одбрана на Туркије, Хулуси Акар, истакна дека Туркије очекува Шведска и Финска да ги исполнат своите одговорности и заложби што се однесува до безбедносните загрижености на Анкара, врз основа на трилатералниот договор потпишан на Самитот на НАТО во Мадрид минатата година, јавува Анадолу.

„Очекуваме да ги исполнат ветувањата. Ние не сме против политиката на отворени врати на НАТО“, рече Акар за Уредничкиот деск на Анадолу во областа Хатај, што беше погодена од земјотресите минатиот месец.

Минатиот јуни, Туркије и двете нордиски земји потпишаа меморандум на Самитот на НАТО во Мадрид за решавање на легитимните безбедносни загрижености на Анкара, отворајќи го патот за нивното евентуално членство во Алијансата.

Меморандумот се однесува на загриженоста на Туркије, вклучително и извозот на оружје и борбата против терористичките организации, како што се ПКК и ФЕТО.

Акар зборуваше и за договорот за житниот коридор во Црното Море, што се очекува да истече на 18 март, велејќи дека Анкара се надева на продолжување на овој договор.

„Двете страни (Русија и Украина) имаат позитивен став и веруваме дека тој (договорот) ќе биде продолжен“, истакна Акар.

Тој ги повтори напорите на Туркије да се осигури дека историскиот договор од Истанбул ќе продолжи да се спроведува, нагласувајќи дека речиси 24 милиони тони жито се испратени до сиромашните преку договорот.

Минатиот јули, Туркије, ОН, Русија и Украина потпишаа договор во Истанбул за обновување на извозот на жито од три украински пристаништа на Црното Море, што беше прекинато по почетокот на руско-украинската војна во февруари 2022 година.

Благодарение на напорите на Туркије, договорот за жито беше продолжен за 120 дена, почнувајќи од 19 ноември.