Гутереш одвоено се сретна со Абас и Нетанјаху во Њујорк

ЊУЈОРК (АА) - Генералниот секретар на Обединетите нации, Антонио Гутереш, одржа одвоени состаноци со палестинскиот претседател Махмуд Абас и израелскиот премиер Бенјамин Нетанјаху во Њујорк на маргините на 78. Генерално собрание на ОН, пренесува Анадолу.

Палестинската агенција ВАФА јавува дека Абас го информирал генералниот секретар на ОН за најновата ситуација на окупираните палестински територии и израелската ескалација на тензиите.

Барајќи од ОН да ја преземат својата одговорност кон палестинскиот народ, Абас побара на Палестинците да им биде дадена меѓународна заштита, да се спроведуваат меѓународните одлуки, Израел да се принуди да го почитува договорот што го потпишал и да се запрат едностраните чекори.

Од друга страна, Гутереш, изрази надеж во решението на палестинското прашање и Палестина да добие статус на полноправна членка на ОН пред завршувањето на неговиот друг мандат на генерален секретар.

Гутереш изјави и дека планира посета на Палестина кон крајот на октомври.

Паралелно со тоа, од кабинетот на премиерот Нетанјаху е соопштено дека и тој се состанал со Гутереш во Њујорк и дека за време на разговорите ја нагласил иранската „дестабилизирачка улога“ на Блискиот Исток.

Нетанјаху, исто така, изјави дека верува оти меѓународните иницијативи со посредство на Соединетите Американски Држави меѓу Израел и Саудиска Арабија ќе резултираат со договор за нормализација и дека новиот економски коридор планиран да се протега од Индија до Европа преку неговата земја ќе придонесе за глобалната економија.

Во соопштението, исто така, се наведува дека Нетанјаху побарал од Гутереш да се откаже од „неоснованата критика“ на ОН кон Израел.