Amir Latif Arain
06 Октомври 2025•Ажурирај: 09 Октомври 2025
АНКАРА (АА) - Кинеските научници открија дека обвивката на Месечината од другата страна е релативно постудена од обвивката на блиската страна, објавија државните медиуми денес, пренесува Анадолу.
Откритието, засновано врз примероци собрани од далечната страна на Месечината преку кинеската мисија „Чанге-6“, може да го продлабочи разбирањето на човештвото за двојната природа на Месечината и нејзините еволутивни процеси, објави англискиот дневен весник „Глобал тајмс“, повикувајќи се на заедничката изјава на Кинеската национална вселенска агенција (CNSA) и Кинеската управа за атомска енергија.
Минатата година мисијата „Чанге-6“ успешно се врати на Земјата носејќи 1.935 грама почва и карпи - први примероци што се собрани од далечната страна на Месечината.
Двојната природа на Месечината, со значителни разлики помеѓу блиската и далечната страна, се смета за една од најголемите научни мистерии во месечевите истражувања.
Според Хе Шенг, истражувач во Пекиншкиот истражувачки институт за геологија на ураниум при Кинеската национална нуклеарна корпорација, во претходните студии се идентификувани силни контрасти во топографијата, распределбата на елементите и карактеристиките на карпите помеѓу двете страни на Месечината.
„Блиската страна е релативно рамна и пространа, а далечната страна е исполнета со кањони, долови и карпести клисури со поголеми топографски разлики“, рече Хе.
Тој објасни дека претходните студии за „двојноста“ на Месечината, главно, се потпирале на податоци од далечинско снимање и симулации, но примероците од почвата донесени со мисијата „Чанге-6“ првпат овозможиле директно и блиско истражување на разликите меѓу двете страни.
Истражувачкиот тим ги истражил температурните варијации помеѓу заштитниот слој на блиската и далечната страна преку анализа на составот на типични минерали, како клинопироксен и плагиоклаза, во примероците од почвата на Месечината од далечната страна.
Резултатите покажале дека температурата на кристализација на примероците на базалт од мисијата „Чанге-6“ е околу 1.100 Целзиусови степени - приближно 100 степени пониска од онаа на примероците од блиската страна што се собрани од мисијата „Чанге-5“.
„Месечината, со својот релативно низок степен на еволуција и доцните модификациски карактеристики, претставува вредна референција за проучување на минатото на Земјата. Значајните разлики меѓу нејзините две страни, исто така, може да дадат нови увиди во еволуцијата на нашата планета“, изјави Ли Зијинг, главен научник во Кинеската национална нуклеарна корпорација.
