Кина тестира роботски кучиња за идни истражувања под површината на Месечината

ИСТАНБУЛ (АА) — Кинеските истражувачи тестираат и „тренираат“ роботски кучиња како подготовка за идно истражување под површината на Месечината, област што се смета за идеална за човечки бази на Месечината, објави „Саут Чајна морнинг пост“ денес, пренесува Анадолу.

Тим од Факултетот за компјутерски науки на Пекиншкиот универзитет разви две специјализирани роботски кучиња за истражувачката мисија и ги тестираше во пештера во Североисточна Кина што е „впечатливо слична“ на лунарното подземје, објави весникот.

Роботските кучиња беа користени како „извидници“ за спроведување задачи за мерења што луѓето не можат лесно да ги извршат во тесни и речиси непроодни премини.

Нивните перформанси во „средините на лава отворите слични на Месечината“ им помогнаа на истражувачите да ги подобрат технологиите за отелотворена интелигенција што се користат во истражувањето на длабоката вселена, рече Жанг Шанганг, истражувач од универзитетот.

Жанг, кој го водеше развојот на двете роботски кучиња, истакна дека овие модели можат автономно да го пронајдат својот пат, да избегнуваат пречки, да создаваат мапи и да снимаат високопрецизни 3Д-структури во пештерите.