Експерти: Вештачката интелигенција претставува поголема закана за нискоквалификуваните работни места

ИСТАНБУЛ (АА) - Вештачката интелигенција (AI), според експертите, претставува закана за нискоквалификуваните работни сектори, повторувајќи ги историските шеми познати со воведувањето нови технологии, јавува Анадолу.

Мухамет Елиеса Којтак, од Одделот за социологија при Универзитетот Медениет во Истанбул, за Анадолу говореше за ефектот на вештачката интелигенција врз безбедноста на работните места.

Тој истакна дека влијанието на вештачката интелигенција врз различни работни сектори е евалуирано и дека, како и секоја технологија, вештачката интелигенција првично ги загрозува нискоквалификуваните работни сектори.

„Секогаш кога ќе се појави нова технологија, секогаш има непријатност и немир меѓу оние што традиционално се занимаваат со таа работа“, рече Којтак.

Во однос на нееднаквоста на приходите во општеството, Којтак рече дека во зависност од социоекономската структура, вештачката интелигенција може да доведе до невработеност кај пониските класи, нагласувајќи дека луѓето со повисоки примања се помалку загрижени за губењето на својата работа.

Потенцирајќи ја инклузивната природа на вештачката интелигенција, тој рече: „Таа има партиципативни аспекти, при што ја користат и студентите, едукаторите, практичарите, па дури и креаторите на политики.“

- „Вештачката интелигенција има позитивни и негативни аспекти“ -

Говорејќи за влијанието на вештачката интелигенција врз различните професии, Којтак ги подели работните места на две: оние што се сензитивни на технологијата и оние што не се.

Фризерските услуги, според него, добиле на брзина со технологијата, но немаат доживеано промена во својата суштина.

Тој истакна дека да се биде сензитивен на технологијата во професиите не мора да има негативна конотација, споменувајќи ги областите како медицината, инженерството, академската област и правото, кои долго време ја користат вештачката интелигенција и еволуирале со неа.

Којтак, исто така, го истакна забрзувањето во работата на универзитетската фела, истражувачите и инженерите што користат вештачка интелигенција и предупреди дека и покрај широката употреба на оваа технологија постои потреба од верификација.

Нагласувајќи ја двојната природа на вештачката интелигенција, Којтак ја истакна важноста од избегнување „поедноставени“ толкувања: „Вештачката интелигенција ја ограничува индивидуалноста во некои аспекти додека ги отвора уметноста, знаењето, трговијата и професиите за поширока употреба.“

„Ние, исто така, можеме да користиме вештачка интелигенција за да ја идентификуваме и анализираме сиромаштијата на детален начин, обезбедувајќи фундаментален увид за праведно и правично креирање на социјалната политика.“