Тунел за дезинфекција на облеката на граѓаните во борбата против ширењето на коронавирусот во Турција

ОРДУ

Во турскиот град Орду е инсталиран „тунел за дезинфекција Aircor52“, јавува Агенција Анадолија (АА).

Во соопштението на градот Орду се наведува дека станува збор за домашен производ наменет за дезинфекција на облеката на граѓаните кои се принудени одредено време да престојуваат надвор и се изложуваат на опасност.

Тунелот функционира на принцип на сензор, а не е штетен за здравјето.

Во соопштението се наведува дека Градската управа во согласност со сопствените можности дизајнирала тунел за дезинфекција, а предадено е и барање за патент.

Градоначалникот на Орду, Мехмет Хилми Ѓулер, изјави дека продолжуваат интензивно да работат на борбата против новиот тип коронавирус, од кој заболуваат сè повеќе луѓе.

Тој појасни дека се преземени низа мерки за граѓаните да можат да продолжат со својата работа.

„Нашиот град разви проект што може да биде пример за другите. Тунелот за дезинфекција, кој го развивме целосно во согласност со сопствените можности, ќе им служи на граѓаните за чистење на нивната облека од бактерии“, изјави Ѓулер.

Тој додаде дека овој проект е подарок за турскиот народ и државата.

Тунелот е инсталиран на прометниот градски плоштад, а голем дел од граѓаните покажаа интерес.