Русија: Путин најави продолжување на карантинот до 11 мај

МОСКВА

Рускиот претседател Владимир Путин денес најави продолжување на карантинот на земјата до 11 мај, со цел да се намали ширењето на пандемијата на Ковид-19, јавува Агенција Анадолија (АА).

Путин изјави дека благодарение на напредните мерки, Русија успеала правилно да се подготви за ширењето на вирусот, повторно да го организира здравствениот систем и да се снабди со лекови и медицинска опрема, што резултираше со помал број на смртни случаи и случаи на заразување.

Проширените мерки вклучуваат продолжување на суспендирањето на работните активности и задржување на затворање на големите градови, вклучувајќи го главниот град Москва и вториот по големина град Санкт Петербург.

Истовремено, Путин и наложи на Владата до 5 мај да ги подготви препораките за постепено ублажување на мерките и националниот план за оживување на економијата и деловните активности со преземање на потребни мерки на претпазливост против повторното ширење на вирусот.

Претходно руските власти потврдија дека 6.441 лица се тестирани позитивни на Ковид-19 во текот на изминатите 24 часа, со што вкупниот број на лица позитивни на тестот на Ковид-19 изнесува 93.558.

Во текот на истиот период, регистрирани се 72 нови смртни случаи со што вкупниот број на починати од последици предизвикани од заразеност од Ковид-19 изнесува 867.

Бројот на излекувани се искачи на 8.458 откако 1.110 нови лица се пуштени од болница.

Во Русија се направени повеќе од 3,1 милиони тестови, а повеќе од 192.000 лица се под медицински надзор поради сомневање од инфекција.