Uğur Aslanhan
03 Февруари 2026•Ажурирај: 04 Февруари 2026
РИЈАД (АА) – Обемот на билатералната трговска размена меѓу Турција и Саудиска Арабија се очекува во краток рок да достигне 10 милијарди долари, изјави денес турскиот министер за трговија Омер Болат, јавува Анадолу.
Говорејќи на Саудиско-турскиот инвестициски форум во главниот град Ријад, Болат истакна дека официјалната посета на претседателот Реџеп Таип Ердоган ќе резултира со потпишување голем број договори меѓу министерствата и деловните организации од двете земји.
Денес Ердоган престојува во официјална посета на Саудиска Арабија, придружуван од првата дама Емине Ердоган и неколку министри, меѓу кои и министерот за надворешни работи Хакан Фидан, министерот за финансии Мехмет Шимшек, министерот за трговија Омер Болат и министерот за одбрана Јашар Ѓулер.
Болат нагласи дека овие договори ќе ги подигнат односите меѓу Турција и Саудиска Арабија на многу повисоко ниво и значително ќе ја зајакнат економската соработка.
Тој посочи дека лидерите на двете земји поставиле краткорочна цел трговската размена да достигне 10 милијарди долари, а долгорочна цел 30 милијарди долари.
„Се надевам дека 2026 година ќе биде година во која ќе ја постигнеме целта од 10 милијарди долари“, додаде Болат.
Тој потсети дека сегашниот обем на трговска размена меѓу двете земји веќе надминал 8,6 милијарди долари.
Според него, билатералната соработка се засилува и во одбранбената индустрија, особено во набавките и заедничкото производство.
- Обнова на Газа -
Болат изјави дека Турција и Саудиска Арабија можат да потпишат значајни договори за соработка со трети земји за обнова на Газа и Украина.
„Подготвени сме да соработуваме со саудиските компании по ова прашање“, рече тој.
Тој изрази уверување дека двете земји ќе воспостават широка соработка во обновата на Газа и поширокиот регион.
„Убеден сум дека Турција и Саудиска Арабија ќе соработуваат интензивно во обновата на Газа и регионот, каде што нашите палестински браќа и сестри претрпеа огромни страдања и разурнувања“, додаде Болат.
