Турција оствари 65,2 милијарди долари приход од туризмот во 2025 година, со над 63,9 милиони посетители

ИСТАНБУЛ (АА) – Приходите од туризмот во Турција во 2025 година изнесуваат 65,23 милијарди долари, што претставува пораст од 6,8 отсто во однос на претходната година, соопшти денес турскиот Завод за статистика (ТУРКСТАТ), јавува Анадолу.

Турција бележи и пораст од 2,7 отсто на бројот на туристи што ја посетиле земјата, односно имало 63,9 милиони посетители.

Просечните трошоци по посетител во 2025 година бележат пораст од 3,7 отсто, односно 1.008 долари, додека просечните дневни трошоци изнесуваат 100 долари.

Во вкупниот туристички приход пакет-аранжманите учествуваа со 28,2 отсто, потоа следат трошоците за храна и пијалаци со 21,1 отсто и меѓународниот транспорт со 12,8 отсто.

Најголем број од посетителите, 67,7 отсто, ја избрале Турција за посета на туристичките места, за забава, како и за спортски и културни активности.

Втора најчеста причина за патување во Турција е посетата на роднини и пријатели, односно 19,6 отсто, по што следува шопингот со 5,9 отсто.

Во меѓувреме, трошоците на Турција за туризмот пораснаа за 24 отсто, односно 9,6 милијарди долари.

Бројот на турски државјани што во 2025 година отпатувале во странство, исто така, бележи пораст од 4,4 отсто, односно 11,9 милиони.