СКОПЈЕ (АА) - Министерот за култура и туризам на Туркије, Мехмет Нури Ерсој, во рамки на посетата на Скопје оствари билатерална средба со министерката за култура на Северна Македонија, Бисера Костадиновска-Стојчевска, известува Анадолу.
Според соопштението на Министерството за култура на Северна Македонија, во фокусот на средбата бил новиот Договор за културна соработка меѓу Владата на Република Северна Македонија и Владата на Република Туркије, кој во името на двете влади го потпишаа министрите Костадиновска-Стојчевска и Ерсој.
„Билатералните односи меѓу Северна Македонија и Туркије се одвиваат во духот на традиционалното пријателство и партнерство и во таа смисла, Договорот кој денеска го потпишавме со сигурност ќе ги продлабочи и онака добрите културни врски меѓу институциите од двете држави, ќе ја стимулира размената на авторите, репродуктивните уметници и ансамблите, ќе го поттикне користењето на ресурсите што се поседуваат, ќе го зацврсти партнерскиот однос на институциите од државите и нивната соработка со меѓународните организации“, истакна Костадиновска-Стојчевска.
Двајцата министри, задоволни од досегашната соработка, изразија подготвеност таа да продолжи преку реализација на уште многу нови иницијативи и проекти со кои ќе се интензивира соработката во делот на културата.
„Задоволни сме од досегашната соработка на уметниците, институциите и здруженијата од културата, од двете земји, особено во литературната, фолклорната и драмската дејност. Уверена сум дека со денешното потпишување на новиот Договор за културна соработка, ќе овозможиме уште побогата институционална соработка, реципрочно користење на капацитетите на институциите, заеднички проекти и иницијативи“, рече Костадиновска-Стојчевска.
Министерката за култура на средбата нагласи дека Република Северна Македонија обрнува големо внимание на реализацијата на проекти со кои се унапредуваа дејствувањето на турската заедница во државава.
„Еден од нив е проектот за нов Турски театар, со чијашто изградба турската заедница ќе добие театарско здание според светски стандарди. Објектот е веќе изграден до фазата затворена карабина, без фасада. Во таа смисла, на средбата го актуелизиравме прашањето за учеството на турската страна во комплетното завршување на објектот, имајќи го предвид потпишаниот Меморандум“, додаде министерката за култура.
Во тој контекст, Костадиновска-Стојчевска изрази уверување и дека наскоро ќе се изнајде решение и за проектот за реставрација и адаптација на објектот Куршумли ан, за активностите на културниот центар „Јунус Емре“ и изрази уверување дека со поддршка од министерот Ерсој, наскоро ќе почне реставрацијата на објектот.
Костадиновска-Стојчевска, поздравувајќи го завршувањето на проектот за реставрација и конзервација на Султан-муратовата џамија во Скопје, ја истакна и одличната соработка со Турската агенција за соработка и координација (ТИКА) со која досега се реализирани повеќе проекти од областа на заштитата на културните знаменитости, со посебен акцент на спомениците од османлискиот период.
Министрите Костадиновска-Стојчевска и Ерсој ја потенцираа и одличната соработка меѓу Националните комисии за УНЕСКО бидејќи, според соопштението, со заеднички заложби се придонесува за промоција на традиционалните вредности кои се дел од светското културно наследство.
Двајцата соговорници изразија уверување дека успешната соработка и планираните активности во областа на културата ќе продолжат и во иднина со истиот интензитет и поддршка од двете страни.
