ТИРАНА (АА) - ФАТЈОН ЦУКА -
Амбра Цека, студентка од Албанија која студира на Универзитетот за медицински науки во Анкара, Туркије, стипендијата што ја добива од турската држава ја донира за лицата погодени од земјотресите кои се случија на 6 февруари во јужниот дел на Туркије, пишува Анадолу.
Цека во изјава за новинарот на АА истакна дека е длабоко погодена од земјотресот кој се случи во Туркије.
„Мојата стипендија ја испратив за пријателите погодени од земјотресот. Како пријатели правиме мал придонес. [Стипендијата] Ја испратив во Хатај“, рече Цека.
Потсетувајќи дека во Туркије се наоѓаат и други студенти од Албанија кои не се вратиле во земјата за зимскиот распуст, Цека истакна дека и тие студенти обезбедуваат парични средства како и помош од друг вид, и покажуваат солидарност.
Собирањето на дел од помошта која во Албанија се донира за Туркије е во координација на Здружението на дипломирани од Туркије (ТУМЕД) со седиште во Албанија, како и на други здруженија.
Претседателот на ТУМЕД, Егерт Хаџиу, ја поздрави помошта која Туркије ѝ ја пружи на Албанија по земјотресот во 2019 година кој се случи во Албанија, и рече дека затоа покажуваат солидарност со турскиот народ.
Хаџиу информира дека граѓаните донираат различни средства, пред сѐ ќебиња и облека, како и донација во парични средства.
„Добивме голема помош. Постојано нѐ бараат преку телефон и носат потребни нешта за деца и млади“, истакна Хаџиу.
Блина Јауплари, која донира средства за погодените од земјотресите во Туркије, рече: „Било облека било средства за хигиена, луѓето се обидуваат да дадат помош на секаков можен начин.“
