Претседателот Пендаровски телефонски разговараше со хрватскиот претседател Милановиќ

СКОПЈЕ

Претседателот на Република Северна Македонија Стево Пендаровски оствари телефонски разговор со претседателот на Република Хрватска, Зоран Милановиќ, пренесува Агенција Анадолија (АА).

„Во разговорот, претседателот Пендаровски изрази сочувство на семејствата коишто ги изгубија своите блиски во серијата земјотреси коишто ја погодија Хрватска. Претседателот Пендаровски изрази и уверување дека Хрватска и сите нејзини граѓани ќе ги санираат брзо последиците од оваа природна катастрофа", се наведува во соопштението од кабинетот на претседателот Пендаровски.

Билансот на смртно страданите лица во вчерашниот земјотрес во Хрватска е зголемен на седум.

Разорниот земјотрес со епицентар кај Петриња, вчера напладне, се почувствува ширум Хрватска. Беше со јачина од 6,2 степени по Рихтер, соопшти Сеизмолошката служба.