Agim Sulaj
02 Декември 2024•Ажурирај: 02 Декември 2024
ПРИШТИНА (АА) - Премиерот на Косово, Албин Курти, изјави дека терористичкиот напад врз каналот Ибар - Лепенац во Зубин Поток е поврзан со руските напади во Украина, јавува Анадолу.
„И во контекст на време и во контекст на природата на самиот чин, изгледа дека овој напад е поврзан со масовните воздушни напади на Руската Федерација на Украина. Нападите кои беа насочени токму против енергетската инфраструктура во Украина“, изјави Курти вчера.
Тој додаде дека еден ден пред нападот во Зубин Поток, на 28 ноември, руските воени сили ја нападнале клучната енергетска инфраструктура во Украина со 188 ракети и беспилотни летала, оставајќи околу еден милион домаќинства без струја, пред зимската сезона.
„Целта е конечно населението да се стави во минимални витални услови за егзистенција и на овој начин да се нанесе штета на здравјето, животот и безбедноста на граѓаните“, рече Курти.
Тој додаде дека нападот на општинската зграда во Звечан и нападите во Украина се случиле во исто време.
„Во Звечан само два дена пред тоа имавме напад врз полициската станица, а сега и врз критичната инфраструктура на северниот дел на Косово, како и во Украина“, изјави Курти.
Тој додаде дека уште поочигледен е фактот дека за време на контролите што косовската полиција ги вршеше на различни локации, по терористичкиот напад, покрај бројното оружје и воена опрема, пронајдени се и повеќе десетици амблеми на руските воени единици.
„Овие амблеми главно припаѓаат на специјализирани единици за изведување специјални воени операции, како што е случајот со амблемите на падобранците на Вооружените сили на Русија, а покрај воените амблеми, при вчерашните контроли беа пронајдени и знамиња на руското царско крило, знаме што го користеше империјална Русија во 18 и 19 век - односно кога рускиот империјализам направи голем историски скок“, додаде Курти.
Тој тврди дека Србија ги копира руските методи за да му се закани на Косово и воопшто на регионот.
„Јасно е дека слободниот и активен престој на главниот криминалец Милан Радоичиќ во Србија е вистината на Србија, која се обидува да ги стави сите свои соседи кои не се членки на Европската Унија во услови на тензија и ризик од дестабилизација“, изјави косовскиот премиер.
Силната експлозија со големи последици на водотекот Ибар - Лепенац се случи во петокот вечерта во селото Вараге во Зубин Поток, на северниот дел на Косово.
Косовската полиција потврди дека како последица на експлозијата е оштетен водотекот Ибар - Лепенац.
Претседателката на Косово, Вјоса Османи, на социјалните мрежи го окарактеризира инцидентот како терористички чин во кој беше нападната виталната инфраструктура на државата.
Косовските медиуми објавија дека постои сомневање дека експлозијата имала намера да ја оштети критичната инфраструктура на Косово со цел да го попречи протокот на вода што се користи за ладење во процесот на производство на електрична енергија во електраните Косово А и Косово Б.
Регионалното водостопанство „Митровица“ соопшти дека е прекинато снабдувањето со вода за пиење поради оштетување на дел од каналот.
„Во повеќето области на северот на Косово, снабдувањето со вода е нормализирано“, изјави вчера косовската министерка за економија Артане Ризваноли.
Високиот претставник на Европската Унија (ЕУ) Жозеф Борел ја нарече експлозијата во каналот Ибар - Лепенац терористички напад, а чинот го осудија многу земји од ЕУ, како и Туркије.
Во врска со овој случај, досега, како што соопшти косовскиот министер за внатрешни работи Џелал Свечла, се уапсени девет лица кои се приведени во полициски станици. Исто така, при полициските рации по овој случај на северот, пронајдено е значително количество оружје и воена опрема.
